Новости ⇒ Йырсы ла, ҡәләм оҫтаһы ла –Харис Шәрипов

Филармония солисы, билдәле йырсы Харис Шәрипов йырсы ғына түгел, ә ҡәләм оҫтаһы ла. Егерме йылдан ашыу республиканың матбуғат саралары менән әүҙем хеҙмәттәшлек иткән сәхнә әһеле Башҡортостандың һәм Рәсәйҙең журналистар союзы ағзаһы итеп алынды.  

Ижади портеттар, мәҙәниәт һәм сәнғәт әһелдәре тураһындағы мәҡәләләр, очерктар – ниндәй генә жанрҙа ижад итмәй ул. Журналистың рус һәм башҡорт телдәрендә донъя күргән ижад емештәре бөгөндә “Башҡортостан”, “Ҡыҙыл таң”, “Тамаша”, “Рампа” һәм башҡа гәзит-журнал биттәрен биҙәй. Үҙенә генә хас яҙыу стиле, һүҙ ҡөҙрәтен тоя белеүе һәм дөрөҫ ҡуллана белеүе Харис Шәриповты  оҫта һәм уҡыусылар яратып уҡыған журналист булараҡ һынландыра.

Күп яҡлы коллегабыҙҙы яңы үрҙәре менән ҡотлайбыҙ һәм ижади уңыштар теләйбеҙ!